Союз Журналистов Республики Абхазия > Новости > Аҧсны ажурналистцәа Реидгыла Елеонора Коӷониаҧҳа лиубилеи лыдырныҳәалеит

Аҧсны ажурналистцәа Реидгыла Елеонора Коӷониаҧҳа лиубилеи лыдырныҳәалеит


23.03.2023

Қарҭтәи атеатртә институти Аҧсуа ҳәынҭқарратә универститет афилологиатә факультети роушьҭымҭа Елеонора Коӷониаҧҳа 1991 шықәса раахыс ажурналистика лнапы алакуп. Еиуеиҧшым аамҭақәа рзы аус луан Аҧсуа телехәаҧшра, ажурнал «Гражданское общество», агазеҭ «Нужная», аинформациатә маҵзура «Sputnik Аҧсны» рредакциақәа рҟны. Аидгыла аҟны иҳаҧхьаӡоит аҧсуа журналистцәа рыҩнуҵаҟа ажәа ахақәиҭреи аиашареи дырзықәҧаҩуп ҳәа.

Лырҿиаратә нысымҩаҿы алитературатәи аполитика-уажәларратәи теледырраҭарақәеи акьыҧхьымҭақәеи маҷымкәа иҟоуп. Изныкымкәа Аҧсны ажурналистцәа Реидгылара имҩаҧнаго арҿиаратә еицлабрақәа рҟны аҧхьахәқәа лгахьеит.

Иазгәаҭатәуп Елеонора Коӷониаҧҳа активла дшалахәыз Аҧсны жәлар рфорум аусура, Аҧсны жәлар Рџьынџәтәылатә еибашьра аан корреспондентс лусура ааныжьны Марттәи ажәылара ашьҭахь медеҳәшьас афронт ахь дышцаз.

Аҧсны ажурналистцәа Реидгыла ахьӡала ареспублика зҽаҧсазтәыз ажурналист Елеонора Коӷониаҧҳа лиубилеитә рыцхә лыдныҳәало илзеиӷьаҳшьоит аманшәалара, агәабзиара, арҿиаратә еихьӡара ҿыцқәа!

Аҧсны ажурналистцәа

Реидгыла ахантәаҩы Руслан Ҳашыг